ایک عام عادت جو کینسر سے بچا سکتی ہے

کینسر ایک عام مرض بنتا جارہا ہے اور حال ہی میں ماہرین نے اس سے بچنے کے لیے ایک عام عادت کی طرف اشارہ کیا ہے۔

امریکا میں حال ہی میں کی جانے والی ایک تحقیق میں بتایا گیا کہ صحت بخش غذا اور دیگر طبی مسائل جیسے فشار خون اور ذیابیطس کو کنٹرول میں رکھنا امراض قلب کے ساتھ ساتھ کینسر کا خطرہ بھی کم کرتا ہے۔

میساچوسٹس جنرل ہاسپٹل اور دیگر اداروں کی اس تحقیق میں بتایا گیا کہ امراض قلب کا خطرہ بڑھانے والے عناصر کینسر کا باعث بھی بن سکتے ہیں۔

اس تحقیق میں 20 ہزار سے زائد افراد کو شامل کیا گیا تھا اور آغاز میں ان میں کوئی بھی کینسر کا شکار نہیں تھا۔

15 سال کے دوران 2 ہزار 548 افراد میں کینسر کی تشخیص ہوئی اور محققین نے دریافت کیا کہ امراض قلب کا باعث بننے والے روایتی عناصر جیسے عمر، جنس اور تمباکو نوشی، کینسر سے بھی متعلق ہے۔

انہوں نے یہ بھی دریافت کیا کہ دل پر دباؤ ڈالنے والے عناصر سے کینسر کا امکان بھی 40 فیصد بڑھ گیا، اس کے مقابلے میں دل کو صحت مند رکھنے والی عادات جیسے بلڈ پریشر، کولیسٹرول، بلڈ شوگر اور جسمانی وزن کو کنٹرول میں رکھنا اور صحت بخش غذا کا استعمال کینسر کا خطرہ بھی کم کرتے ہیں۔

ماہرین کا کہنا ہے کہ دل کی شریانوں سے جڑے امراض اور کینسر کے درمیان تعلق براہ راست نہیں مگر ہماری عادات یا رویے اس پر اثر انداز ہونے والے عوامل ہیں۔

تحقیق میں موٹاپے اور سگریٹ نوشی کے نتیجے میں جسم میں دائمی ورم اور کینسر کے درمیان تعلق کو بھی دریافت کیا گیا۔

ماہرین نے مزید کہا کہ پھلوں اور سبزیوں کا زیادہ استعمال دل کی صحت کے لیے مفید ہوتا ہے جو کولیسٹرول کی سطح میں کمی کے ساتھ ورم سے لڑنے والے اجزا سے بھرپور ہوتے ہیں۔

 

کینسر یا سرطان کو تیزی سے پھیلنے والا موذی مرض قرار دیا گیا ہے، جس کی اگر بروقت تشخیص نہ ہو تو انسان کی جان جانے کا خدشہ ہوتا ہے۔

عام طور پر کینسر کی علامات اُس وقت ہی ظاہر ہوتی یا اس کی تشخیص اُس وقت ہوتی ہے جب سرطان جسم میں پھیل چکا ہوتا ہے، یہی وجہ ہے کہ جب کینسر کی تصدیق ہوتی ہے تو یہ دوسرے یا تیسرے اسٹیج پر ہوتا ہے۔

کینسر کی اگر ابتدائی مرحلے میں تشخیص ہوجائے تو انسان کو بروقت طبی امداد (آپریشن یا ادویات) دے کر اُس کی جان بچائی جاسکتی ہے مگر ایسا بہت کم ہی دیکھنے میں آیا ہے۔

کینسر کی ویسے تو بہت ساری اقسام ہیں مگر ڈاکٹر چھاتی کے سرطان کو سب سے زیادہ خطرناک قرار دیتے ہیں کیونکہ اس میں جان جانے کا خطرہ دیگر کے مقابلے میں زیادہ ہوتا ہے۔

عام طور پر ’بریسٹ کینسر‘ کی تشخیص اس وقت ہوتی ہے جب وہ دوسری یا تیسری اسٹیج پر پہنچ چکا ہوتا ہے، اسی طرح دیگر طرح کے کینسر بھی تاخیر سے تشخیص ہوتے ہیں۔ کینسر کی تشخیص کے بعد اگرچہ ماہرین اس کے ہونے کی وجوہات بھی جان لیتے ہیں۔

کینسر کیا ہوتا ہے؟

سرطان یا کینسر جاندار کو لاحق ہونے والے ایسے امراض کا مجموعہ ہے جن کا تعلق بنیادی طور پر خلیات سے ہوتا ہے۔ جب جسم کے کچھ خلیات معمول (normal) کی رفتار سے اپنی نشو و نما جاری نہ رکھ پائیں اور تیزرفتاری سے اپنی تعداد اور جسامت میں اضافہ کرنا شروع کر دیں تو سرطان پیدا ہوتا ہے۔

مزید پڑھیں: ہماری روزمرہ کی غذا میں شامل وہ چیز جو کینسر سے بچا سکتی ہے

ماہرین کے مطابق انسانی جسم میں خلیات تقسیم ہونے کی رفتار مخصوص ہوتی ہے جس پر پہنچنے کے بعد یہ عمل رک جاتا ہے اور پھر خلیات مردار ہونا شروع ہوجاتے ہیں۔

اس کے برعکس سرطان شدہ خلیات مستقل تقسیم ہوتے رہتے ہیں اور ان میں پروگرامی خلیاتی موت کا نظام بھی ناقص و ناپید ہوجاتا ہے۔ اور جب بڑھتے بڑھتے سرطان کے خلیات گروہ کی شکل میں ایک مجموعہ بنالیتے ہیں تو اس طرح ایک جسم وجود میں آنے لگتا ہے جس کو ورم (tumor) یا رسولی بھی کہا جاتا ہے۔

اس ورم کی وجہ سے اس کے اردگرد کے معمول کے خلیات پر بہت زیادہ دباؤ پڑتا ہے اور خون کی فراہمی متاثر ہوتی ہے جس کی وجہ سے بہت سی بیماریاں جنم لیتی ہیں۔ طبی ماہرین جسم کے اندر ہونے والے زخم کو بھی کینسر کا ہی نام دیتے ہیں۔

یہ بھی پڑھیں: سعودی ڈاکٹرز نے خون کے کینسر کا جدید طریقہ علاج ڈھونڈ نکالا

جب جسم میں زخم یا سوجن ہوتی ہے تو  متاثرہ خلیات اپنے اصل مقام سے علیحدہ ہوجاتے ہیں جس کے بعد یہ جسم کے دیگر اعضاء اور حصوں تک پہنچ جاتے ہیں یہی جسم میں سرطان پھیلنے کا اہم سبب ہے۔

کینسر کس طرح پھیلتا ہے؟

آپ نے اب تک کینسر پھیلنے کے بارے میں سُنا ہوگا مگر یہ نہیں جانتے ہوں گے کہ درحقیقت یہ کس طرح اور انداز سے پھیلتا ہے۔ اس حوالے سے طبی ماہرین نے مختلف تحقیقی رپورٹ کا مشاہدہ کر کے تھری ڈی اینیمیٹڈ ویڈیو تیار کی تاکہ لوگوں کو اس حوالے سے آسانی کے ساتھ سمجھایا جاسکے۔